Эмпатия, бейімделу, креативтілік, өзін-өзі бақылау және ынтымақтастық бағыттарының симбиозы

Мектепке дейінгі жастағы балалар тұлға ретінде қалыптасу және әлеуметтік бейімделу процесінен өтеді. Сондықтан оларға әлеуметтік ортаға сәтті бейімделуге және болашақта табысты адам болуға көмектесетін soft skills дағдыларын дамыту қажет. Балаларда коммуникативтік дағдыларды, топта жұмыс істеу қабілетін, эмоционалды интеллектін, көшбасшылық қасиеттерді, шығармашылық ойлауды және шешім қабылдай білу дағдыларын дамыту маңызды.

Soft skills бойынша қосымшалар келесі дағдыларды дамытуға бағытталған:

Эмпатия – бұл басқа адамның сезімін түсіну және оған жанашырлық таныту қабілеті. Эмпатия – тума қабілет емес, тәрбиенің нәтижесі. Оның негіздері ерте жастан бастап қалануы керек. Эмпатияны бала кезден тәрбиелеу қажет: үлгі көрсету, айналадағы адамдардың эмоциялық жағдайына назар аудару, баланың өз құрдастарымен көп ойнауына және ішкі дүниесі туралы сөйлесуіне мүмкіндік беру.

Балаларда бейімделу қабілетін дамыту оларға жаңа ортаға оңай бейімделуге, күтпеген оқиғаларға сабырлықпен қарауға көмектеседі. Жоғары деңгейдегі бейімделу интеллектісіне ие балалар өзін-өзі дамыту мен білім алу қабілетіне ие. Олар тезірек үйренеді, ақпарат пен шешімдерді өздігінен іздей алады. Мұндай балалар эмоционалды тұрақты болады және стрессті, мазасыздықты, көңілсіздікті және басқа да жағымсыз эмоцияларды жеңіп шыға алады.

Креативтілік — бұл жаңа әрі құнды нәрселерді жасау қабілеті. Балаларда креативтілікті дамытуды мүмкіндігінше ерте жастан бастау керек. Балаларда кішкентайынан танымға деген қызығушылық байқалады. Олар әртүрлі құбылыстар мен заттарға қызығушылық танытады және әртүрлі нәрселерді өз қолымен құрастырып жасауды жақсы көреді. Балалардың кез келген тапқырлық әрекетін қолдау қажет.

Өзін-өзі бақылау – бұл адамның өз эмоцияларын, ойларын және әрекеттерін бақылау қабілеті. Бұл дағдыны дамыту үшін бала есте сақтау, зейінін аудару және ойлау қабілеттеріне сүйенеді. Өзін-өзі бақылау дағдысын дамыту үшін бала дұрыс әрекет алгоритмін есте сақтап, әрекеттер тәртібін түсіндіре білу және қорытындылардың дұрыстығын дәлелдей алу қажет.

Ынтымақтастық дағдысы балаларға командада жұмыс істеуді, дауларды шешуді және ортақ мақсаттарға қол жеткізуге көмектеседі. Сонымен қатар эмпатия, тыңдай білу, өз ойларын жеткізу және басқалардың көзқарасын құрметтеу сияқты әлеуметтік дағдыларды дамытуға көмектеседі.