7.02.2025
“Negesh” кешенінің таныстырылымы
Іскер әйелдер қауымдастығының басшысы Меруерт Коттабаевна Лештаева және Жамбыл облысы бойынша Қазақстандық үздіксіз білім беру қауымдастығы филиалының басшысы Эльнура Төрегелдиевна Құрманалиеваңың қолдауымен 7-ші ақпанда жеке меншік мектепке дейінгі білім беру ұйымдарының құрылтайшылары, басшылары мен әдіскерлері үшін "Negesh" инновациялық танымдық кешенінің таныстырылымы өтті.
Кездесуде қатысушылар "Negesh" кешенінің идеялық концепциясымен, құндылықтарымен, принциптерімен және мазмұнымен танысты. Мектепке дейінгі тәрбие мен оқытудың мемлекеттік жалпыға міндетті стандартының талаптарына және мектепке дейінгі тәрбие мен оқытудың үлгілік оқу бағдарламасына сәйкес әзірленген әдістемелік құралдар мен жұмыс дәптерлері педагогтердің үлкен қызығушылығын тудырды. Басшылар мектепке дейінгі жастағы балаларды жан-жақты дамыту үшін қажетті әдістемелік құралдар мен жұмыс дәптерлерін ұлттық құндылықтарға негізделген бірыңғай танымдық кешенге жүйелеу педагогтердің жұмысын едәуір жеңілдететінін атап өтті. Кешенде бір жылға арналған жас топтары бойынша ұйымдастырылған іс-әрекет ұсынылған. Әдістемелік құралдың барлық бағыттары бойынша тапсырмалар бір жұмыс дәптерінде ұсынылғаны қолдануға ыңғайлы.
Педагогтерді қызықтырған кешеннің тағы бір ерекшелігі – педагогтердің біліктілікті арттыру курстарында оқу және курстан кейінгі қолдау мүмкіндігі. Бағдарламаның жаңалығы - озық әлемдік технологиялардың ұлттық тәрбиенің дәстүрлі әдістерімен үйлескені. Бағдарлама мектепке дейінгі ұйымдар педагогтерінің ойлауын өзгертуге, оларды педагогикалық ізденіске белсенді қатысуға ынталандыруға, балалармен өзара әрекеттесудің жаңа әдістерін игеруге бағытталған.
Нобель сыйлығының лауреаты, профессор Джеймс Джозеф Хекманның айтуынша, "Өмірдің алғашқы бес жылында балалардың оқу және даму әлеуеті жоғары және бұл оларға инвестиция салуды ақтайды". Кездесуге қатысушылар "Negesh" кешенін тәрбие-білім беру процесіне сәтті енгізу үшін ата-аналардың қолдауы маңызды рөл атқаратынын атап өтті. Сондықтан жақын арада ата-аналар қауымымен кездесулер жоспарланған.